Han har engasjert seg i debatten om namnet på den nye vidaregåande skulen på Bryne.

Ikkje før har den nye skulen på Bryne kome seg gjennom ei heller komplisert unnfanging, så pusher fylkeskommunen på for å få namn på nykomlingen på plass.

- Gjerne innan mars. Me vil unngå det Vågen vidaregåande opplevde, at namnet knapt var klart før skulen er ferdig, seier Ole Jan Olsen, som er ansvarleg for planlegginga av den nye skulen i Hetlandskvartalet.

Namn er merkevare
Time kommune har alt ønskt seg namnet Bryne vidaregåande skule. I ei spørjeundersøking på nettsidene til Time vidaregåande seier 48 prosent at Jæren vidaregåande er best. Svært få fell for forslaget frå tidlegare fylkesordførar Arne Bergsaker, Arne Garborg vidaregåande skule. Time er også på veg ut som skulenamn.

I Lokomotiv Media sine nye lokale i høghuset på Bryne sit Atle Jerstad og ser ned på skuletomta. Med sitt mangeårige engasjement for å profilera jærske verksemder, oppmodar han til å tenkja nøye etter - og utradisjonelt.

- Namnet på den nye skulen vil vera med å byggja merkevaren og renomméet som skulen vil trengja i hard konkurranse med dei andre skulane langs Jærbanen, seier reklamemannen.

- Merkevarebyggjing og profilering blir viktig for skulen framover. Nå ligg både Jåttå og Vågen der med spanande tilbod. Jærbanen gjer desse tilgjengelege for elevar som mange ser heller vel seg skuleplass på Bryne.

Vidsyn vidaregåande?
Jåttå vidaregåande nyttar omgrepet SVEV i profileringa si. Både som eit bilete på bygget som ligg og svevar, men óg som eit signal om å løfta seg sjølv til å sveva vidare. Ei stund vart det vurdert om skulen skulle heita Svev.

– Kva ord og omgrep kan stå godt til ein ny vidaregåande skule på Bryne?
Jerstad minner om at Jæren er prega av det opne landskapet og den jærske drivkrafta. Det er fleire Petter Smartar her enn i Hardanger.

– Vidsyn kan vera eit godt ord, men det finst heilt sikkert fleire gode. Ein kan tenkja seg omgrep som famnar det å ikkje sjå grenser, - det opne landet, fritt for stengsler, også mentalt.

Sist haust starta eit nytt skuletilbod ved Time vidaregåande skule, for ungdom som ikkje fiksar vanleg skulekvardag. Tilbodet bærer namnet Plogen. Det meiner Jerstad er eit godt døme på korleis namn kan vera med og skapa positivitet og draiv rundt ei verksemd.

– Kor viktig er diskusjonen rundt namnet på den nye skulen?

– Framfor alt er det knytta mykje kjensler til namn. Når det er avgjort vil all debatt leggja seg raskt.

Likevel, ein bør tenkja etter kva ein vil at namnet skal signalisera og fortelja om skulen, seier Atle Jerstad.

Får Jerstad gjennomslag for idéane sine, vil det i alle fall sprenga grenser. Alle dei offentleg eigde vidaregåande skulane i Rogaland, med unntak av Stavanger Katedralskule, bærer stadnamn.

Det er politikarane i fylkestinget som tek den endelege avgjerda om kva skulen skal heita.

Har meiner du skulen bør heitta?