– De har starta på ei storsatsing, sa Magnhild Meltveit Kleppa før ho greip spaden og sette den symbolsk i jorda.

– Eg er heilt sikker på at de vil få stor glede av senteret. Arne og Hulda har medverka til at fleire har fått mot til å meina. Det kan bli eit utstillingsvindauga for ekteparet Garborg.
 
De har valt å satsa på ungdom i alderen 15-25 år, det er lurt av dokke, meinte ministeren.

Gravearbeidet på bygget til 58,5 millionar har alt starta. I oktober 2010 skal biblioteket takast i bruk, januar 2011 skal etter planen Garborgsenteret opnast for publikum.

Alle femteklassingane i Time var inviterte til denne historiske hendinga.  

– De femteklassingar vil vera viktige brukarar av det som skal veksa opp her, sa ordførar Arnfinn Vigrestad. Først bibliotek og Garborgsenter, så vidaregåande skular i 2014.
 
Ordføraren kom inn på den lange vegen fram mot byggestart.

– Midt på 1990-talet var det uklare planar om eit slikt senter, 15 år seinare kan me endeleg setta spaden i jorda. Undervegs har det vore delte meiningar om bygg og plassring, eg er glad for at me no er i gang, sa ordføraren.

– No ventar me på at staten kjem med klingane mynt til senteret, la han til.
Magnhild Meltveit Kleppa hadde ingen sjekk med seg til kommunen,  heller ingen lovnader om at det vil vanka pengar.

Til Jærbladet seier ho at søknaden på 10 millionar kroner til å fylla senteret med innhald er motteken og lesen. Den raud-grøne regjeringa har planer om ein kulturløft II. Når dette senteret er etablert, må staten stilla opp, la Magnhild Meltveit Klepp til.