Torsdag opnar ho dørene til ein 1300 kvadratmeter stor butikk med mote for barn, ungdom og dame, kosmetikk, undertøy og stormote for damer. Her er alt frå kvardagsklede til finstansen, klede for nyfødde til dame størrelse 46.

– Me satsar på god kvalitet og stort utval, seier Bjelland.
15 medarbeidarar skal sørga for service til det dei trur er ein stort marknad. Butikken er den einaste i HM-kjeden mellom Sandnes og Kristiansand.
 
Torsdag er ein stor dag personleg for Annbjørg Bjelland (43), trebarnsmor frå Lye som har ein lang karriere bak seg i butikkbransjen. Ho blir sjef for ein stab på 15. Det har vore rift om jobbane hos klesgiganten med internasjonal profil.

Vil stoppa lekkasje
Annbjørg Bjelland har jobba tre år i HM, det er ein draum for henne å opna butikk nettopp på Bryne.

– Jærbuen har venta på Hennes & Mauritz i mange år. Ikkje minst har folk etterlyst barne- og ungdomsklede, det satsar me stort på i denne butikken. Eg har god tru på at vi skal kunne stoppa trafikken innover, seier Annbjørg Bjelland.

Rundt henne er det hektisk innspurt. Det meste av kleda er hengt opp på stativa, bare finpussen står igjen tysdag ettermiddag. Dei siste 14 dagane har det vore arbeidd under høgtrykk for å få alt klart.

– M44 er eit kjempebra senter. For meg er det som å koma heim, smiler Annbjørg Bjelland.

– Har andre butikkar grunn til å skjelva i buksene i frykt for konkurranse?

– Eg håper HM skal vera positiv for alle på Bryne - auka handelen og stoppa handelslekkasjen innover, seier Annbjørg Bjelland.